A educación sexual e os dereitos sexuais

Declaración dos dereitos sexuais

1. O dereito á liberdade sexual. A liberdade sexual abarca a posibilidade da plena expresión do potencial sexual dos individuos. Exclúese toda forma de coerción, explotación e de abusos sexuais en calquera tempo e situación da vida.
2. O dereito á autonomía, integridade e seguridade sexual. Este dereito inclúe a capacidade de tomar decisións autónomas sobre a propia vida sexual dentro do contexto da ética persoal e social. Tamén están incluídas a capacidade de control e goce dos nosos corpos, libres de tortura, mutilación e violencia de calquera tipo.
3. O dereito á privacidade sexual. Este involucra o dereito ás decisións e condutas individuais realizadas no ámbito da intimidade, a condición de que non interfiran nos dereitos sexuais doutros.
4. O dereito á equidad sexual. Este dereito refírese á oposición a todas as formas de discriminación, con independencia do sexo, xénero, orientación sexual, idade, raza, clase social, relixión ou limitación física ou emocional.
5. O dereito ao pracer sexual. O pracer sexual, incluíndo o autoerotismo, é fonte de benestar físico, psicolóxico, intelectual e espiritual.
6. O dereito á expresión sexual emocional. A expresión sexual vai máis aló do pracer erótico ou os actos sexuais. Todo individuo ten dereito a expresar a súa sexualidade a través da comunicación, o contacto, a expresión emocional e o amor.
7. O dereito á libre asociación sexual. Significa a posibilidade de contraer ou non matrimonio, de divorciarse e de establecer outros tipos de asociacións sexuais responsables.
8. O dereito á toma de decisións reprodutivas, libres e responsables. Isto abarca o dereito a decidir ter ou non fillos, o número e o espazo entre cada un, e o dereito ao acceso pleno aos métodos de regulación da fecundidade.
9. O dereito a información baseada no coñecemento científico. Este dereito implica que a información sexual debe ser xerada a través da investigación científica libre e ética, así como o dereito á difusión apropiada en todos os niveis sociais.
10. O dereito á educación sexual integral. É un proceso que se inicia co nacemento e dura toda a vida e que debería involucrar a todas as institucións sociais.
11. O dereito á atención da saúde sexual. A atención da saúde sexual debe estar dispoñible para a prevención e o tratamento de todos os problemas, preocupacións e trastornos sexuais.

Os dereitos sexuais son dereitos humanos fundamentais e universais. 

Declaración do XIII Congreso Mundial de Sexología, 1997, celebrado en Valencia, revisada e aprobada pola Asemblea Xeral da Asociación Mundial de Sexología, WAS, o 26 de agosto de 1999, no XIV Congreso Mundial de Sexología, celebrado en Hong Kong, República Popular Chinesa.